行程: Ari (Lay Lao, Onedee Cafe, Sati-Handicraft coffee, Some time blue) , JJ Market, Siam Paragon, Let's Relax Spa
今日係星期六, 指定動作梗係去JJ Market啦. 而我最想去相隔Mo Chit兩個站既Ari站睇下. 網上話Ari站好多好既餐廳及Cafe, 係文青地帶.所以我想去睇下.
肥團友雖然唔係文青, 但佢好喜歡去新既地方睇下, 所以佢同青姐就join埋睇下.
我地由於要去Mo chit, Ari等地方, 所以就買左張bts one day pass, 價值140b.
我地出落左車落左行人天橋就見到檔串燒店. 我地買左黎食, 好好味呀. 次後行轉左入一條路好多粉紅色既街邊檔. 不過我既目的地係Lay Lao所以冇幫襯.
Lay Lao係米其林指南推介.所以想試下. 呢餐最有印象既就係佢既魚, 魚外面好香, 味道酸酸地好惹味.
Lunch後我地又忍唔住去Onedee Cafe試甜品. 我又叫左我最愛既泰茶雪糕. 好味.
飯後甜品完我地就分開行啦. 青姐肥仔去JJ Market, 而我就Coffee Shop朝聖.
我選左一間好叫Sa-Ti Handcraft Coffee, 由Ari站行過去要成15分鐘, 係下午行真係又曬又熱, 有傘有風扇都唔多掂.附近好似住宅區咁咩野都冇. 去到固度先有d店鋪. 但起初我搵唔到入口, 搵左好耐先發現佢表面係一間叫don don好似日式快餐之類既店.所以走過頭唔奇怪, 但google map明明話呢度, 所以我周圍留意下, 發現門口有箭咀話入面有咖啡. 我入到去原來裡面係另一天地.
backyard有間玻璃房, 都有好多人黎歎咖啡.
我order左手沖, 但好可惜呢間手沖係用聰明杯既, 可能latte固d會比較好. 佢呢度有泰國咖啡豆賣. 又有single origin豆, 所以我買左返香港沖.
另一間我好想試下既係叫some time blue. Sutida Srirungthum係2016泰國手沖No.1. 店鋪係Ari站另一邊既一個住宅停車場門口. 好隱秘.黎到我當然order手沖咖啡. 我竟然見到有布隆迪所以就試下啦. 其實味道都唔錯既, 不過我而家飲多左淺焙豆所以都覺得佢好濃. 反而我對gravity印象深d, 因為好少會係espresso係奶上面, 所以覺得好得意. 呢杯反而有驚喜喎.
唔經唔覺已經好晏, JJ Market就close, 我因為想買畫所以即刻閃去Mo chit站, 我whatsapp問青姐邊度賣畫, 佢話Section 7有, 我直接就走去睇下啦. 可惜睇唔岩, 同埋好多都好大幅, 好難拎番香港.
6點後JJ Market既店開始close, 我行到6點半就離開, 見青姐肥仔去左Siam Paragon, 所以我又去左固度行下. 佢地話係樓下food court等食野. 我地終於以掃街形式食左串燒同小食. 之後再去Siam Paragon超市行下. 見到網友推介既蝦頭. 於是買黎番Apartment試.
7點多我地要返Asok Apartment放好戰利品, 8:00我地就去對面Terminal 21 6樓既Let's Relax做Spa. 我地一早經肥仔既朋友係泰國book左, 再係klook買package. 我試左佢地有名既熱石加堆油, 青姐試熱石及四手. 肥仔因為之前係Let's Relax有太痛既經驗, 所以佢只做oil massage. 我地原本係book左1間2人房及1間single room, 但佢竟然安排我地3個人1間房!!! 我地兩男一女都好尷尬. 問佢有冇得轉佢話full哂, 即係焗我地既啫!!!
我地唯有輪流沖涼換衫時, 一個把風叫肥仔面向門口唔好偷望! 場面攪笑! 之後我地做緊massage時叫佢唔好望呢邊. 如是者過左個半鐘肥仔倣完oil masssage加scrub就閃先. 我同青姐繼續. 做完spa已經11點半, lobby冇哂人, 職員即刻俾埋芒果糯米飯我地食. 我地見佢地好似趕收工就拿拿臨食埋就閃. 我地whatsapp肥仔睇佢係邊, 佢話係老MC, 所以我地又去搵佢, 食左少少野, 諗起隔離Robinson超市係開24小時, 所以就行埋先返Apartment.
沒有留言:
張貼留言