今日我地去另一個蟹祭, 就係位於沙灘旁既三國蟹祭. 我地諗住留肚係固度食早餐. 今終於輪到青姐出山揸車啦.佢個車牌已經冰封好多年啦, 為左今次旅程佢搵左個師傅補鐘黎.佢咁有誠意肥仔咁係俾機會佢揸下啦.
短短十五分鐘既車程肥仔話佢成日偏離去左邊=P 但都去到目的地既 =P 主場駐車場又full哂, 只好泊去臨時駐車場, 步行經過海水浴場就到達會場. 到達後見到一條長長人龍排緊隊. 原來係為左限定蟹湯而排既. 我地見咁長龍都放棄, 行個圈睇下有咩食先. 我地見到除左有一隻隻蟹賣之外, 好多檔口都唔係賣蟹既.好多都係串燒, 蕃薯薯餅等等, 同禽日既越前蟹祭好唔同. 我地只見到一檔賣蟹飯. 我就只好買牛串, 薯餅, 蕃薯食. 真係好失望呀.
我地11點就離開會場, 見到會場對面有間蜂蜜店, 所以就入去睇下. 肥仔見到有蜂蜜軟雪糕就試下. 我就試佢既硬雪糕. 另外我買左d蜂蜜同埋蜂蜜糖做手信.之後我地行返去駐車場拎車. 見有好多時間, 所以就去埋三國有名景點東尋訪參觀. 其實福井海岸線有氣勢磅簿既懸崖,有成一公里. 係有名既絕景. 我地影左好多相. 之後就去附近既土產店行逛. 途中見到燒海鮮好似幾吸引就入去食蠔, 帆立貝, 魷魚等.再整個雪糕食下. 14:30就出發去加賀溫泉站還車. 在還車前不忘到油站入滿油再去還車.
還車後我地就去加賀溫泉站西口等送迎車. 有個哥哥仔拎住花紫巴牌係度搵人, 於是我地便上前相認叻. 佢帶我地去乘車處上車, 呢個車站有d似澳門碼頭出面既賭場巴士站咁, 但就係泊左好多溫泉酒店巴士.
我地等左一陣有另一家日本人上車, 之後車便駛至花紫. 我地一落車已經有旅館職員歡迎我地. 帶我地辦理手續, 拎哂行李.帶我地上房間. 嘩! 一入門口前面有個沙石鋪成既玄關! 右手邊係一個小和室, 再轉左先會到大和室. 大和室都算大, 窗邊仲有4張椅,正值賞楓旺季, 大家可以坐係窗邊欣賞鶴仙渓景色, 好美. 我地已急不及待影相. 女將就奉上茶及和果子, 再問我地晚餐及早餐時間,再奉上免費咖啡coupon便徹退. 於是我地便落lobby飲咖啡, 再去溫泉層食冰. 之後再出去走走, 到六點半我地就去食事處開餐啦.
食事處佈置得好靚, 每個dinning place 都用和紙分隔開, 保持私隱. 我地豁出去咁選左最豪華既全松葉蟹宴. 由於加賀溫泉位於石川縣, 所以呢度既松葉蟹叫加能蟹, 標籤係藍色的.
首先頭盤係香箱蟹, 廚師已經將蟹肉蟹膏蟹籽拆好放入蟹殼內, 呢個就係名為香箱蟹既原因. 肥仔見到拆好既蟹肉好高興, 因為禽日固餐雖然好好味但就要自己拆蟹拆得好辛苦喎.所以佢特別欣賞. 佢既蟹醋調較得好好味. 再黎就係松葉蟹公每人半隻, 雖然比禽日食既蟹稍細, 但鮮度不減, 佢又會幫我地拆埋蟹, 加分!再黎一道由蟹丸整成既柚子湯, 唔錯唔錯. 再黎就係刺身, 其中會有兩隻蟹腳刺身. 平時大家都覺得蟹刺身淡淡的冇蒸烤咁濃味. 但呢個蟹腳真係好甜喎. 之後又黎炭燒蟹每人半隻, 估唔到佢會用熱石保溫. 烤過既蟹好香炭燒味, 蟹肉濃郁, 蟹膏加埋miso整成既醬真係超好味.正正正!!!
跟住就係shabu shabu, 女將話湯底係鰹魚湯, 我忍唔住飲左一啖, 嘩! 好甜呀, 未飲過咁甜既鰹魚湯. 好夠味. 再將蟹腳放入pot內十下十下, 真係超好味. 本來諗住十完蟹就飲哂d湯, 但後黎變得越黎越咸啦, 所以應該一早飲多幾啖.
其實已經食到飽左, 但仲有蟹粥. 呢個就正正常常啦, 最後見到有個甜品拼盤. 點知黎到見到得一杯pudding既物體.但menu明明就寫住green tea custard, candied chestnut, squash sponge cake, sweet red-bean, green tea bracken-starch dumppling.我地食左一啖, 啊原來係好多layer整成既綠茶甜品, 因為佢用好多材料整成, 綠茶味又夠濃, 口感非常豐富, 真係超讚!整個蟹宴有齊蒸, 烤, shabu shabu, sashimi, 真係好滿足! 今餐我地食左成三個鐘, 食到肚滿腸肥!
晚餐後我地就番上房預備浸溫泉. 女將已經鋪好床啦. 我地hea左陣就去浸展望露天風呂. 不過就覺得太細, 沖涼位都得三個, 換衫位都好細.浸到12:00展望露天風呂close, 我就話不如浸埋大浴場, 咁聽日就唔使咁早起身溫泉. 大浴場就真係大好多, 沖涼位都多好多. 但我其實就鐘意
浸露天風呂多d既, 所以浸左陣我就沖埋涼上房休息啦.
花紫
沒有留言:
張貼留言