2018意大利深度遊Day 7 (威尼斯Burano, Murano)

行程: 威尼斯 (Murano玻璃島, burano彩虹島)

今日行程plan左去兩個外島Murano and Burano. 但事前肥團友想去超市打個round, 所以我地一早去左酒店附近超市行下. 之前係羅馬超市買唔到野, 應該都買唔到d咩, 點知錯哂! 呢間有好多pasta賣, 就係pasta已經成行, 選擇困難症得很 >_<.

終於買左好多pasta同埋sauce, 咁重就拎返酒店先, 然後再坐火車去主島再坐水上巴士去Murano.
Murano玻璃島以handmade玻璃聞名, 我地見到有d店既玻璃好精緻, 亦都好貴, 一個小小既生果籃就要幾千蚊! 買我地就買唔起啦, 唯有係島上食個lunch先. 我地當然order左海鮮拼盤啦.佢既蝦幾甜喎. 食飽左下大雨, 我地去埋Burano島參觀下先.

Burano係以lace聞名, 同時島上河既兩邊有好多colorful既小屋, 色彩繽紛, 係打卡勝地. 可惜我地去到一直落緊雨. 所以影相唔係咁靚.

團友們話要走先, 所以佢地坐船返Murano島再行下. 我就買左塊lace table decor先走. 去到Murano已經5點幾, 原來Murano既店好多6點就close!
我於是好快咁兜圈, 途中見到一間店既貓狗玻璃裝飾好可愛, 店主又話係佢做既, 見到有隻燈色狗狗雖然細細隻, 價錢百多元都俾得起所以去買.

買完我就坐船去返主島. 原來佢地已經坐緊火車返酒店休息啦! 因為又大風又大雨, 所以我都決定返酒店. 途中係車站見到Venchi, 買左好多粒粒朱古力返香港做手信或慢慢食. 6,7蚊粒價錢唔貴啦. 買完朱古力whatsapp問佢地食唔食晚餐, 佢地話累所以唔出. 結果我買左老麥返酒店一齊食叻. 聽日先再出過去啦.

2018意大利深度遊Day 6 (佛羅倫斯烏菲茲美術館, 威尼斯聖馬可大教堂, 聖馬可廣場, 嘆息橋, 利雅托橋)

行程: 佛羅倫斯 (Galleria degli Uffizi烏菲茲美術館), 威尼斯 (聖馬可大教堂（St Mark’s Basilica）和總督府（Doge’s Palace）, 聖馬可廣場, 利雅托橋（Rialto Bridge）, 鳳凰歌劇院（Teatro la Fenice）, Scala del Bovolo, 嘆息橋 (Bridge of Sighs))

今日又要一早起身去烏菲茲美術館. 我地係網上預約9:00. 一早去到已經有一批人排隊買票, 好彩我地係網上買左票. 我地一開始跟人潮由高層向下層參觀. 唔同既房間展出不同既畫作. 其中既有名畫作有:

1 喬托　莊嚴的聖母

2 馬蒂尼　天使報喜

3 烏切洛　聖羅馬洛城之戰

4 波提且利　春

5 波提且利　維納斯的誕生

6 達文西　天使報喜

7 提香　烏爾比諾的維納斯

參觀完烏菲茲美術館, 我地就返去hotel拎行李, 去火車站坐火車去Venezia Mestre. Venezia Mestre係入本島既一個地方, 因為主島內住宿比較貴, 所以我地住係周邊再坐火車入去.
Venezia Mestre坐火車入去Venezia SanLucia好快, 15分鐘就到, 車次都算頻密. 我地去到Venezia SanLucia就買左張2日水上巴士pass, 可以兩日內任坐水上巴士.

我地首先坐2號水上巴士去聖馬可廣場. 其實1號同2號都可以去聖馬可廣場. 1號就zipzag形咁左右站站停, 遊船河慢慢睇就最好. 2號線就快d到馬可廣場, 憲法橋等.

我地上岸後就去左歎息橋先, 再到聖馬可廣場影相. 之後就行下唔同既店鋪. 好彩有google map, 唔會容易迷路.

去到憲法橋又影左陣相, 係時侯醫肚啦. 我地係google map搵到間幾高分既餐廳試下. 呢間餐廳價錢唔平, 但好好味呀. 佢既ravioli係魚做而唔係豬肉. 佢既蜆汁好惹味. 拿破崙又唔同一般既, 吉士整得好.

食飽左我地就坐返船再轉火車返酒店, 不過就要睇住時間, 唔好太夜, 因為船8,9點就開始疏架啦. 趕唔到要訓街架啦 =P

烏菲茲美術館
http://www.b-ticket.com/b-ticket/uffizi/default_eng.aspx