自從2015年有位同事菁姐坐係我隔離後, 我地兩個女人就成日雞啄唔斷傾計, 又成日"聊"大家食野, 買野, 去旅行咁.之後佢又聊我去滑雪tim.....
其實我都好想去滑雪好耐架啦, 但係因為我既老朋友都唔係太鐘意郁, 好多都鐘意食玩Hea買,
所以我一直都未有機會學滑雪. 今次機會終於黎啦, 我同事既舊同事A君聊佢join ski tour去韓國滑雪. 佢就問左我同另一位o靚仔舊同事H君去唔去. H君玩開溜冰梗係想去學滑雪啦, 而我因為有人陪我一齊學滑雪梗係好啦. 就咁樣我地4個人就一齊報左5日4夜既ski tour去high one滑雪啦.
聽聞ktx travel既韓國ski tour都幾好, 所以就報左2016年2月中既5日4夜high one go go ski. 行程會住3晚high one雪埸附近酒店, 包哂2.5日既雪具, 好似我咁既初學者更包埋1.5日既滑雪課程. 團費6千幾, 其實都幾抵架.
先講下go go ski tour既好處:
1. 包哂2.5日雪具
2. 初學者包埋1.5日既滑雪課程
3. 送埋2晚night ski
4. 我地上次join ktx同時間有3個團, 所以佢都會將3架旅巴變做shuttle bus, 每隔10分鐘送團友去雪場.
5. 團既食物算唔錯.
go go ski tour缺點:
1. 第5日要我地跟佢去埋d comission店, 對於我呢d去過7次首爾既人黎講真係唔掂.
2. 領隊唔係好想俾我地離團
3. 係首爾住既酒店離mtr比較遠, 要行起碼15分鐘.
酒店優點:
1. 酒店房幾大間.
2. High one resort包早餐同晚餐buffet. 味道算唔錯, 聽D姐講High one buffet比龍平好.
3, view唔錯
4. 酒店雖然比較遠, 但有gondola直通山頂
酒店缺點:
1. 酒店比較遠, 如果好似我呢d學神級人士要坐shuttle先去到ski center.
2. 酒店雖然有gondola到山頂,但gondola會因天氣惡劣而停開.
3. 由於酒店唔係ski in ski out, 所以要靠shuttle出入, 但shuttle比較疏. D姐同A君佢地有日miss左ktx shuttle,
4. 要等普通shuttle先返到酒店, 結果攪到差d食唔到dinner buffet.
high one滑雪場優點:
1. 坐gondola上山頂有個旋轉餐廳,可以360度欣賞雪景.
high one滑雪場缺點(超級新手黎講):
1.就我呢個新手而言, 我覺得滑雪場俾初學者既設施位置唔係太好. 因為有輸送帶既地方設係山中, 要坐gondola先可以去到, 由valley去到mountain base再上山中花左成15分鐘, 所以浪費左唔少時間. 如果佢係base可以設一個俾初學者練習且設有輸送帶既area就更好啦.
2. 我聽菁姐講韓國既雪質一般, 係韓國滑雪好似滑冰咁, 係北海道先係叫滑雪. 的確佢有d地方好似冰咁滑, 用ski boot行真係好容易p架 >_<
ski course and skiing
第一日下午先開始, 由於班機delay左, 所以去到High one就要即刻趕上2:00堂, 全程得1個韓國教練, 全程得韓文, 要靠導遊翻譯. 個教練講左幾句就叫我地照做, 唔夠詳細. 好彩第一日2小時教既都係簡單既技巧, 例如上雪板, 平地滑行, 跌低起身, 橫向上山同A字?車. 所以我地仲可以應付, 4:00過後我地就自行練習. 晚飯過後我地繼續night ski練習, 起初諗住去番Valley Base前既小斜坡練習, 點知俾人阻止入內, 唯有係beginners area小斜坡隔離既非正式斜坡練習, 由於冇輸送帶, 所以滑完落去要慢慢行番上去都好累.
 |
| 初學者地帶但冇輸送帶 |
第二日上午原先話學轉彎, 下午先上山, 點知上午就俾教練帶左上山, 跟住佢係一條有彎度既斜坡叫我地滑落黎, 同時要係教練前面停低! 大哥呀, 我地都未學轉彎喎, 結果大部份人都跌低或撞網, 而我就撞低左阿伯! 導遊好緊張問阿伯有冇事, 因為佢地好驚碰瓷黨, 即扮被撞親而騙賠償! 到此我先知原來韓國都會有呢種事發生既. 教練見到呢條斜坡唔太適合我地, 所以就帶我地再坐gondola上山, 到站後再上輸送帶上坡, 上到去就叫我地係上面滑落. 我由於頭先撞低阿伯,
所以有d驚. 好彩導遊親自拎住我兩條ski pole帶我滑一次, 等我感受到幾大個A字先會剎停到. 我終於成功滑到啦, 我一滑到落山個教練已經話要收番著係我地身上既ski school 衫仔啦, 我覺得個教練唔係好得囉.
食完lunch到左下午ski course, 佢又叫我地坐gondola去番頭先固度, 咁又坐左15分鐘, 再上輸送帶到坡頂, 今次佢叫我地試下滑去另外一邊, 固邊平少少, 我今次好慢咁落到山, 之後佢叫我地上輸送帶上番坡, 但係呢輸送帶又長又慢, 上到頂要幾耐下. 上到山頂佢開始教左幾下轉彎,
我又係唔係好清楚, 好彩到我滑落去時又遇到導遊, 佢又輕輕帶住我等我放膽d轉彎, 我又成功落到山坡啦. 之後我地又上輸送帶上去再試一次,
我地排隊落坡期間, 教練又話時間到要收衫, 但係我地都未滑落去喎, 感覺教練有d不負責任. 好彩仲有導遊同領隊係度繼續幫大家. 今次我終於自己慢慢咁滑到山下, 去到山下, 開始轉到少少彎. 整個ski course黎講, 雖然有1.5日好似好多咁, 但其實太多人上堂, 又要一個個黎落山, 又要坐gondola, 浪費左好多時間. 個韓國教練唔係好得, 講左幾句就叫大家做. 反而覺得導遊小姐教得好, 佢會講多d技巧俾我地聽, 又會親身用pole引導我點滑.當晚食完buffet後, 我同新手H君繼續上番山練習, 夜晚既雪開始冰冰地, 所以比較滑, 好容易飄移 =P
第三日H君同菁姐參加左ski and snowboard比賽, 而我就去番禽日既山坡練習. 練到一點幾我d朋友已經比完賽, 佢地仲上左山頂滑左一轉呢.學過溜冰同速滑冰既H君果然係唔同d既, 佢同我一齊學左1.5日就已經識由山頂滑落山腳啦, 可憐我仲係一條小斜坡上練習緊, 不過就冇跌低到,
只係轉彎仲係未好smooth, 唔夠大同一邊轉得好過另一邊 =P
佢地滑左轉之後就黎搵我食lunch, 我地禽日係山腳食, 今次決定係山上食, 坐gondola上到山見到有間旋轉餐廳, 可以欣賞雪景, 所以我地就去好好品嘗美食. 食飽飽佢地話順手滑埋落山, 我就諗住坐gondola去番中途站既小斜坡練習, 點知想上輸送帶時突然有個職員唔俾我上, 由於言語不通聽唔明佢講乜, 之後有位稍識英文既韓國人同我講佢話beginners唔可以上去, 就係奇怪. 我唯有繼續坐gondola落山, gondola職員話由於大風gondola可能會close, 叫我快d落去, 結果我冇得再練習啦. 如果佢係山下有條附輸送帶既小斜坡俾初學者練習就好啦.
第四日大家可以繼續自費滑雪, 但3點就要上旅巴番首爾, 所以大家決定唔滑雪, 去附近既地方行下. 我地首先去左mountain condo行下影下相, 再坐shuttle去火車站附近行下, 食埋燒肉做午餐. 之後就番酒店拎行李等返首爾. 係Everland食完晚餐就去江南區既酒店check in. check in後我地就自己去左新沙洞同東大門行下. 回程時又遇到黑的, 好彩我地人多share番價錢都唔算貴.
第五日旅行團會安排去comission店購物, 由於我以前已經跟過2次團, 去過哂呢類店, 所以唔想再去, 我同領隊講離團, 佢就冇咩所謂, 但導遊就好明顯唔想囉, 佢想距絕我地, 好彩領隊幫我地擺平導遊, 不過代價係我地要自己拎行李去機場! 我地為左走佬就冇所謂啦.
於是我地一早就寄存行李係酒店, 就去左景福宮睇換更儀式, 之後就去逛三清洞, lunch就係大瓦房食醬蟹. 貴就貴左d不過幾好食. 之後我地就去左超市掃貨, 買完都已經4點, 於是我地就即刻番酒店拎番行李離開. 原本酒店外有機場巴士站, 但我地驚塞車, 所以行去mtr坐mtr去首爾站轉火車. 點知拎住行李行15至20分鐘小斜路先到, 好累. 我地去到首爾站諗住用新通道去首爾火車站, 點知要行一條長樓梯先到, 我吸左口氣就諗住衝上樓梯, 點知行行下突然覺得行李輕左好多, 回頭一望原來有個大叔托住我個行李, 佢一直幫我托到上樓梯頂, 真係好好. 之後我地就去到火車站買普通票去機場, 冇坐Express, 因為價錢平好多. 1個小時就到機場啦,咁就結束5日4夜行程. 雖然滑左3日雪真係好累, 但如果唔學咁多日下年就會咩野都唔記得架啦.
