熊出沒注意: 北海道賞花美食自駕遊Day 2

27/07/2008 第二天

行程: 阿寒湖 --- 屈斜路湖 --- 硫磺山 --- 摩周湖 --- 羅臼 --- 知床橫斷道路 --- 知床峠 --- 知床夕陽台 --- 知床宇登呂

揸車大約時間: 阿寒湖 => 屈斜路湖冇料風呂 (1:30 hr)
              屈斜路湖冇料風呂 => 硫磺山 (30 mins)
              硫磺山 => 摩周湖第三展望台(20 mins)
              摩周湖第三展望台 => 羅臼痳布 (2 hrs)
              羅臼痳布 => 知床峠 (45 mins)
              知床峠 => 知床夕陽台 (30 mins)
              知床夕陽台 => Dolphin Hotel (10 mins)

係日本, 好多所謂露天風呂都係有蓋同有圍欄圍住既, 只因為位於室外, 所以就叫露天風呂.. 我最唔鐘意呢種露天風呂叻,因為咩野風景都睇唔到. 有的好似欺騙人既感覺.. 我心目中既露天風呂係無遮無擋無蓋既風呂. 一係可以欣賞遠處既風景, 一係就周圍都係花草樹木, 置身其中好似同大自然接觸咁, 咁先最正. 阿寒湖遊久之里鶴雅酒店既庭園露天風呂就係一個好既選擇, 因為佢可以欣賞阿寒湖既美景.

由於第一天的溫泉旅館實在太貴，同埋佢地位於1/F同8/F o既溫泉係交替制，禽日浸左1/Fo既庭園露天風呂,今朝六時多起身浸8/F的天台露天風呂. 據團友說她昨晚浸過該風呂, 可以看到星星o忝,所以幾歹要一早起身再泡多次溫泉先得..

原本我地約左一齊上去浸溫泉, 但係可能之前搭零晨機既關係, 再加上張tatami實在太舒服, 所以有兩個團友最後敵唔過睡魔, 死都唔願起身. 冇辦法啦, 唔好理佢地啦, 我地自己去浸啦.

總括而言, 我喜歡1/F庭園露天風呂, 因為一面浸溫泉一面欣賞美景, 好舒服..

8/F的露天風呂只有企係度先可以欣賞美景, 浸o左落去就乜都睇唔到啦, 可能夜晚去就好的, 因為可以見到滿天星..

大浴場更衣室, 好Grand

八時多吃個自助早餐先，個自助早餐都幾多選擇, 味道都ok架.

溫泉旅館的早餐

吃完早餐就上o左九樓展望台和酒店對開欣賞阿寒湖美景,再出酒店湖邊影相. 阿寒湖景色都唔錯, 可惜我地冇時間上觀光船啦.

溫泉旅館九樓的Gallery, 可以欣賞美麗的阿寒湖

係時候出發了，已經overun左了.　第一站去屈斜路湖，有的團友會浸無料露天風呂，其餘o既團友會去硫磺山同牧場騎馬．

沿途有好多S型既大彎路, 肥團友唔係好慣, 所以揸得好慢.

點知我地去到屈斜路湖，發現個溫泉係吉o既，原來咁o岩工事進行中close 左!!! 冇計啦，大家只好係附近影相算數, 有團友仲跳落個溫泉度扮浸o忝, 幾enjoy呀 =P

屈斜路湖有好幾個無料露天風呂, 這是其中一個, 和味無窮Suki同Ricky生就係係呢度浸溫泉呢!可惜工事進行中close左

簡陋的更衣室

屈斜路湖

好啦好啦，唔好影啦，走啦走啦，overun啦，就係咁我地向住摩周湖進發，途經硫磺山，落車影幾張相繼續前進..

終於到左摩周湖第三展望台，因為呢個展望台可以望到湖的正面，二來由於交通不便，所以少的人來，三來個駐車場係無料.
我地上到去個展望台一望，嘩!! 好靚呀!!! 又話摩周湖大部分時間係霧中，所以好難見到佢一面，所以有霧之摩周湖之稱??
但我地所見既摩周湖係好清楚，由於呢個湖係冇水流入，所以波平如鏡，連雲o既倒影都清晰可見, 好有仙境feel..

欣賞完摩周湖後，我地就駛去第一展望台借厠所同睇土產店, 但架車只能泊在路邊, 因為第一展望台同硫磺山駐車場都要410yen.
方便完我地要趕兩個鐘經中標津入羅臼食特選海鮮拉麵, 呢個拉麵就係Ricky生介紹過, 話1500 yen有好多海鮮o既拉麵啦..
唔知係咪個GPS靠害，佢行親都係的小路，仲要塵土飛揚, 我地開頭仲以為係帶頭o既團友自己行小路，但團友話佢都係跟GPS o架咋，GPS唔知條路係咁o架>_<, 攪到架車污糟哂o忝
去到羅臼食堂，點知開到三點咋，已經close左 >_< ,大家唔係太肚餓，決定唔食lunch, 早的食dinner. (待續)

我地向世界文化遺產知床進發，首先就係知床八境之一o既知床峠-國道334，呢條路係冬天係唔開o架，每年四月至十月先開, 由羅臼通往知床宇登呂，所以一場o黎到都好想去睇下.. 呢條山路乃可欣賞知床及羅臼群山的地方, 同時可以遠眺羅臼及國後島呢!

世界文化遺產知床八境 => 知床峠

跟住我地去o左知床八景o既夕陽台，夕陽台位於知床宇登呂溫泉區o既露營場附近, 見到好多人係度露營呀, 沿路仲俾我地見到野蝦夷鹿o忝呀!! ^O^ 因為知床出沒的動物有熊, 鹿同狐狸. 呢次係我第一次見到野鹿咋, 佢地唔係好似動物園咁
俾野圍住架, 所以見到佢地心情份外興奮, 為o左影相仲越行越埋o忝 =P

往宇登呂沿途風光

知床露營場

蝦夷鹿

由於距離日落仲有一段幾長o既時間, 而且又怕蚊, 所以有d人就決定去酒店先啦, 夫婦團友就留返影日落照, 靠哂佢地啦, 因為佢地有靚靚相機..

世界文化遺產知床八境 => 夕陽台

眺望宇登呂溫泉區

我地第二晚既住既酒店係叫Dolphin Hotel, 我地兩個月前係web search到, 係一間好細o既family hotel, 由一個專業o既電視台camera man山本先生開既, 因為佢好鐘意知床呢個地方.. 而我地今次想試下住民宿, 有獨立洗手間就更好, 呢間酒店就係海邊, 間房雖然細, 但戶戶向海, 聽住的海浪聲好舒服.. 食物乃由當地漁民新鮮補穫,
一泊兩食 9450 yen, 價錢合理, 唯一唔好係location, 因為唔係係正宇登呂內, 而係距離宇登呂五分鐘車程, 所以如果你冇車既話就比較煩啦. 我地差的都miss左個入口呢!

Dolphin Hotel

我o地check in左後, 就係酒店對開o既小石灘影下相，吹下海風，肥團友同團友D驚夫婦團友唔識入黎, 於是就揸左架車去搵佢地(其實肥團友去左便利店買雪糕食)..

大約七點幾等齊人就食o左餐幾豐富o既晚餐，有八爪魚, 蟹, 魚, 螺, 薯仔. 的前菜好鬼鹹呀!! 的蟹同薯仔就好味.

食飽飽團友A2同團友K就去浸旅館附設既小露天風呂, 我因為要同肥團友研究行程就冇去.之後我, 肥團友, 獨男團友M同司機D去揸左架車出去探路, 因為我地聽日就要オシンコシンの滝遊覽. 但就唔sure係邊, 只知道離酒店好近.. 團友D由肥團友引路下去左條好靜冇街燈既路, 仲越行越恐怖, 最後肥團友話當條路係岩喎, 於是就係中途截返去便利店入貨, 由於沿途冇乜街燈既關係, 所以一抬頭就見到滿天星星, 好靚呀^O^ !! 好耐都未見過滿天星星o既景象啦. 後來聽番女團友話係酒店附設o既小型露天風呂都可以欣賞到滿天星呢!!

小插曲:

原來FujiFilm 部細機的face detection好勁架, 話說肥團友係旅館幫我同團友D影相, 點知佢一睇番preview就笑得好勁, 我地就問佢點解, 佢show左張合照俾我地睇, 好正常呀.... 跟住佢俾番對焦既地方我地睇.. 咦, 明明得兩個人, 點解會有三點既呢?? 最正係固第三點.. 咁岩就落左係團友D既重要部位度, 真係笑到我地肚都攣埋 =D

酒店對開的可灘