2018台中台北之旅Day 4 (18度C朱古力店, 中社花海, 東海教堂, 埔里酒廠, 高美濕地, 彩虹眷村, 逢甲夜市)

行程: 埔里酒廠, 18度C朱古力店, 彩虹眷村, 東海教堂, 中社花海, 高美濕地, 逢甲夜市

日月潭藍天水灣民宿早餐款式唔多, 但中,西, 生果, 水果, 豆漿等等, 都算豐富既, 而且味道唔錯, 大家都覺得呢間民宿唔錯啊.

我地今日包左車去台中郊區玩. 原先既司機要接載一大班人所以就介紹另一司機俾我地. 之前講左大概行程, 9點半司機準時到達. 我地一上車司機就每人俾支水我地, 話天氣熱要飲水.

我地第一站去埔里酒廠. 裡面賣好多酒類產品, 有香腸, 肉乾, 果凍等等.

我地買左d肉乾. 而司機請我地食紹興酒蛋, 都幾香酒味. 之後佢化身攝影師幫我地影相, 幾好服務.

第二站18度C朱古力店, 首先我地買左幾粒朱古力, 肥仔就去隔離買雪糕食. 我同菁姐就去對面飲免費咖啡.

第三站我地去彩虹眷村,彩虹眷村係由彩虹爺爺黃永阜作畫, 可謂一畫成名. 但呢個地方唔算好大, 逗留半小時已夠.

好肚餓呀, 我地叫司機介紹午餐, 佢介紹我地去阿水師食豬手. 我地每樣都order左, 味道唔錯.

東海教堂位於東海大學內, 建築感唔錯.

下一站我地去中社花海睇花, 裡面有薰衣草, 向日葵等等花海, 唔算好大但都有影相位. 日本既花海比這裡靚. 但呢度比小瑞士花園好好多. 天氣真係超熱, 我地影左一小時便離開. 司機不斷幫我地影相, 估唔到包車服務咁好.

天氣實在太熱, 我地叫司機車我地去買台式飲品飲. 大熱天時飲凍冰冰飲品好爽.

太陽開始落山, 係時侯去整個行程最期待既高美濕地啦. 肥團友一早叫我地預備拖鞋去高美, 因為經過一條長長木道就係海. 木道兩邊好多蟹仔. 過左木道大家都赤腳係水中散步, 欣賞有天空之鏡美譽既高美濕地, 不過如果人少d會好些, 因為實在係太多人啦=P

話咁快已經天黑, 要回台中市區啦, 司機就問我地要唔要買手信. 我兩位團友話冇興趣, 我就想買太陽餅, 於是佢載我地去一間似係commission既餅店叫如邑樓. 我地一坐低店員已每人派左個原味太陽餅. 食落就同普通太陽餅冇咩分別.

之後佢店員拎左一碟餅出黎俾我地試食, 嘩都幾多喎好大方. 除左餅外仲有免費茶飲.

我覺得最好味既係芝痳味太陽餅同檸檬餅. 芝痳味好濃好香但唔甜, 我下次去一定會再買. 我兩位團友原本唔買, 但食左檸檬餅後佢地話好味, 最後大家都買左野.

我地見時間唔早諗住直接去逢甲夜市, 但司機唔介意超時, 將我地送返曼特先生check in放低戰利品先再去逢甲夜市. 真係感受到台中人既熱情. 閒聊間知道佢好鐘意唱KTV, 咁岩我地3個都好鐘意唱K, 所以就諗住邀請佢唱K. 佢話要問下老婆先. 去到逢甲夜市, 我地就分別啦. 由朝9玩到晚9, 大約4500NT, 因為朋友介紹所以不加超時費, 我地覺得整個trip可以玩完上車歎冷氣去下一景點, 司機服務又幾好, 都值得俾呢個價既.

之後我地係逢甲食左明倫蛋餅, 炸杏飽菇. 串燒等, 之後10點幾諗住走, 發覺附近巴士好多唔經台中火車站, 要行20-30分鐘先有巴士站, 仲要好似要趕尾班車. 呢個時侯包車司機whatsapp我話佢老婆唔俾佢出黎唱K. 我同佢講左我地冇車返酒店既情況, 佢居然話有需要早半小時同佢講佢會開車黎接我地, 真係好好. 不過我地最終都趕到尾班巴士返酒店.