2018台中台北之旅Day 3 (合歡山, 日月潭, 伊達邵, 向山自行車道)

行程: 日月潭玄光寺, 金盆阿嬤的香菇茶葉蛋, 伊達邵市集, 向山自行車道, 向山遊客中心

零晨三點鐘, 我地出現係酒店大堂, 真係好眼訓, 但為左睇日出, 無辦法啦 -_-

我地join左團, 三點就有架紅色車接我地, 首先去左一個地方睇下星星, 之後就到合歡山上睇日出, 睇住紅霞初現, 太陽慢慢升起, 天色開始明亮, 好靚.

7點多我地就返酒店食早餐, 國民賓館既早餐好普通, 都係求其食飽就算 =P

於國民賓館check out後就係大堂等okbus. 我地係klook book左架ok bus由清境去日月潭, 唔使轉車, 方便快捷.今日van內只有我地3人, 好似包車咁好舒服, 由於太早起身, 9點一上車就釣魚, 到10:30到我地先醒.

我地住日月潭藍天水灣民宿, 未夠鐘check in, 老闆娘好熱情招呼我地, 教我地點玩日月潭. 佢話我地經佢地可有優惠價坐船遊覽日月潭, 遊覽完先check in, 再踩單車. 我就想夜晚睇埋螢火蟲, 佢話俾錢佢地可以車我地去睇螢火蟲.咁我地就報左名先.

我地首先去水社碼頭坐船去玄光寺, 見到有間好出名既茶葉蛋就買黎試下, 嗯... 茶葉蛋唔夠入味, 好普通. 之後上左玄光寺參觀一陣就坐船去伊達邵市集.

伊達邵市集好多野食, 岩哂肥團友啦. 我地買左阿薩姆紅茶,刈包等當午餐.

2點多我地返回酒店check in, 房間有設計感好舒服, 大家都好滿意.

3點我地係民宿隔離租左單車, 2小時價錢都唔平, 但一場黎到就算啦.

我地踩單車經向山自動車道到向山遊客中心, 沿途風景唔錯, 但係於32度踩單車真係超熱, 沿途又冇風, 下次應該唔會咁做 =P

還左車我地返民宿涼冷氣, 之後行左一陣水社街, 再求其食左個晚飯, 7點老闆就車我地去睇螢火蟲. 由於多人參加, 老闆要分幾次載客,諗住載一批人自己行再返去載另一批, 但佢地唔識英文所以解釋唔到俾一家荷蘭客聽, 佢地就求助於我地. 最後我地就成為佢地既翻譯.

我地去到一處黑暗既車路, 老闆帶我地行左一陣, 講解左一陣, 然後教我地行到一個位就可以調頭. 跟住佢就返民宿接其他團友.
我地於黑黑既路上行走, 只見有好多白色閃閃既物體, 有d係兩邊草叢山邊, 好似聖誕燈飾咁. 有d就係前面飄過, 好想用手接觸佢.
係網上得知4,5月係螢火蟲求偶季節, 所以特別多. 我地一面行一面同荷蘭旅客傾計, 但佢地個女女就驚黑, 喊起上黎呢. 8點多我地就返酒店
休息, 好好享受下民宿房間.