我地行經陣屋前朝市, 於是就去睇下. 朝市檔口唔多,大都售賣水果, 漬物等. 最吸引我地既就係飛騨蘋果啦, 好多唔同既品種, 最正係可以試食呢! 以前我覺得蘋果只係得甜同唔甜既分別. 但同一時間試多左唔同品種就會發現甜都有唔同感覺架.有d係清甜, 有d就香甜, 有d會有酒香味添. 我同肥仔都喜歡陽光呢個品種既蘋果.所以我買左兩個. 150yen 1個好抵買. 青姐就買多左個青蘋果. 之後見到有班講廣東話既大叔大嬸經過. 佢地試完之後話而家香港既蘋果俾TG污染, 所以要買一箱番香港呢. 聽佢地講佢地係跟團既呢.
好啦我地繼續到宮川朝市. 宮川朝市真係非常熱鬧, 兩旁都會有好多檔口同店鋪. 我首先俾一間用cookie裝咖啡既檔口所吸引.最正既係雖然咖啡好迷理, 但店主都可以拉花. 之後可以坐係川邊飲下咖啡, 好悠閒. 飲完仲可以連杯食埋呢! 好環保喎.
之後我又買左杯吉士布甸食, 吉士味幾香, 唔錯. 之後入左豆吉, 發現呢間有焙茶豆賣喎, 又唔小心買左. 另外仲有好多飛騨樸葉味噌, 飛騨牛卷, 飛騨牛漬物, 土產, 其中有d可以試食架. 有得試食自然又唔小心買左堆土產.真係估唔到我地會買咁多野 >_<
買完野我地又搵左間店買飛騨牛串同飛騨牛薯餅食. 都唔錯呢.
之後我地去高山老街行下. 因為肥仔話驚晏左冇得食飛騨牛壽司, 所以我地即刻去左最旺場固兩間排隊先. 飛驒こって牛有4款set選. 我當然選set c啦, 因為又有壽司又有軍艦. 我因為之前未食飽, 又見咁長龍所以一口氣買左兩set呢!呢間店用上最高級飛驒牛, 油脂唔錯, 但就有筋. 最有驚喜係生牛軍艦, 加埋蛋汁一齊食好好味. 食完牛仲可以將盛載牛既碟食埋呢, 因為隻碟其實係煎餅黎, 又係好環保喎.
之後我同肥仔又試另一間坂口屋. 今次我試左牛toro. 配上醬汁都幾好味既.食完壽司我地開始行下高山老街. 老街除左土產外仲有精品賣架.
到左2:15我地就集合去高山濃飛巴士站買奥飛騨まるごとバリューきっぶ 2日間フリープラン, 價錢6000 yen.之後我地就坐14:40濃飛巴士到新平湯溫泉既禅通寺前站. 再行5分鐘就到達我地今晚入住既溫泉旅館饗家.
饗家位於奥飛騨溫泉鄉. 其實奥飛騨由平湯温泉・福地温泉・新平湯温泉・栃尾温泉・新穂高温泉組成.奥飛騨尤其多秘湯, 不過都有好多旅館係混浴架 =P 而我地比較著重料理, 所以選入住料理旅館. 饗家係一間好細既旅館, 只有5間房. 一入旅館就要除鞋. reception都以和式佈置. 職員奉上茶及果子, 之後便俾張英文說明紙我地睇. 因為佢地唔識英文, 所以預先打好英文instruction.最主要係說明溫泉用法, 幾點close, 旅館主館10點會鎖門, 幾時會有人幫我地鋪tatami等. 之後就帶我地去別館睇下.
其實旅館由兩間屋組成, 主館就係房間, 2間貸切風呂及免費茶水間.職員話可隨意飲咖啡, 食雪糕. 之後要著木屐去隔離既別館.們口有飛騨牛奶供應, 每人自己拎一支. 到左別館就係食事處, 再過d就有另外兩間貸切風呂. 別館10:30就鎖門, 所以別館風呂只開放至10:30. 職員介紹完設施就帶我地回主館上房. 又係冇電梯既, 要經過長樓梯, 好彩我地冇帶喼黎啫.
我地之前洗左好多錢係花紫度, 所以呢間住平番少少, 房間選左8疊, 所以唔算大. 我地settle down後即刻落reception拎貸切風呂key浸溫泉. 旅館會將四間貸切風呂既key放係reception則, 如果冇左就即係俾人book左. 所以我想即刻book別館既溫泉浸下先.咁岩有兩間溫泉都有位, 所以我同青姐去左別館岩の湯. 其實四間貸切風呂都有一個內湯同一個外湯. 除此之外我地發現每間風呂都有按摩器玩. 岩の湯就有一張按摩椅, 非常正, 而佢既外湯係相對比較有開放感, 同埋大dd. 而肥仔浸既係主館既宝の湯.佢話外湯太細, 只容得落佢一個人!! 呵呵, 係咪因為佢surface area太大呀 =P
浸完溫泉我地就去別館食dinner啦. 成個course會有野菜, 松茸湯, 合桃鴨, 再黎就係主角燒飛騨牛. 每度菜式都整得唔錯.之後仲有川魚, 早鳥送既飛騨牛小鍋, 仲有芝士蕃茄沙律都好特別. 雖然係唔同既食材整成, 但味道就好夾, 最後黎埋甜品好滿足.
晚飯後我地又要玩貸切風呂啦. 今次我同青姐試埋別館既陶の湯, 似乎別館既風呂開放感好d又大d, 夜晚可以欣賞滿天星星. 好靚.而房內有個腳底按摩機. 我地玩左陣就同肥仔swap左風呂. 等肥仔10:30前都可以玩陶の湯.我同青姐就坐係茶水區飲下茶, 食個vanilla雪糕休息下先再浸.
休息後我地就浸左桧の湯先. 之後就回房休息. 估唔到酒店會提供壽司俾我地做宵夜呢. 肥仔就最高興啦. 浸完溫泉暖笠笠最好訓個靚覺.
宮川朝市
料理旅館奥飛騨山草庵饗家
陣屋前朝市
沒有留言:
張貼留言