今日一早Ken哥就打電話過黎, 話佢見到酒店對出有堆建築物, 所以叫我地一齊出去視察下環境, 原來固堆建築物係餐廳黎. 我地望下有冇早餐食, 結果見到有間Cafe開左, 我地決定入去食早餐叻.
Cafe提供簡單早餐, 1500yen都幾貴, 但比Hilton應該平好多. 我地食完早餐見到有royce雪糕, 有好多口味, 結果我地忍唔到口早餐仲要天寒地凍食雪糕!
早餐過後青姐話想去Hirafu滑下, 所以佢一個人坐Shuttle去左Hirafu. 而Ken哥就負責照顧我地兩個新丁. 佢叫我地留係酒店, 佢就出去周圍滑下同視察下有咩路線岩我地滑. 大約10點半佢話搵左幾條路叫我地去試下.
跟住我地去左酒店樓下租滑雪用具. Ken哥叫職員俾短d雪橇我地, 因為短d會慢d易控制d. 我地租左138cm, 似乎真係短d易控制.
著好裝備Ken哥帶我地穿過Dining Area, 就係固度試下滑落去. 但係我覺得太平, 所以好多時要用pole幫忙滑行. 落到底我地就坐gondola上去試下一條短既Next Stage, 呢條路比頭先固條斜d好滑d, 不過對我黎講實在太短. 但對Ada姐黎講就岩岩好, 可以好好練習. 又有gondola上返去, 落到去可以入Green Leaf Hotel休息下. Ada姐開始有進步, 亦開始對滑雪有d興趣.
我地滑左兩次, Ken哥見大家都有所進步, 佢就去左高d既地方滑落黎. 而我就係度滑左幾次. Ada姐滑左兩次就入左Green Leaf休息, 我過左一陣就入埋去, 等埋Ken哥去樓上食lunch.
lunch後Ada姐同Ken哥影下相, 我就試下Shakey Knees滑落去, 但第一次唔熟路, 停低搵路結果原來前面有段路太平坦. 要用pole幫手先過到. 唔係太好滑.
我坐gondola上返去搵Ada姐, Ken哥話帶我去酒店坐Chairlift玩Final Sling. 睇我攪唔攪得掂落車固下. 之前聽佢地講話固架chairlift落車條路比想像中斜, 好容易會跌低. 所以就黎到站時我都好驚. 落車固下真係有d斜, 我即刻要A字咁滑, 好彩終於都停到. 好野! 冇跌到.
準備好我就開始試滑一次, 呢條路開始同尾後都比較斜, 中間就好平. 所以開始滑時唔好剎車,
以衝力就可以滑過平坦部份路段. 滑過幾次之後開始知道點樣控制速度. 如是者我一口氣滑左6次先肯收手!
滑到6點半天已經黑哂, 青姐已經收工, 原來佢對私家snowboard boot個底甩左!!! 於是我地就還番滑雪用具, 坐Hilton shuttle去Hirafu食dinner.
Hirafu十字街係二世古最多人既地方. 固度有好多滑雪用品店同餐廳. 我係固度買左滑雪sock. 青姐就買左snowboard boot. 但係職員要幫佢較好對boot, 所以我地其他人去搵位食飯先. 滑雪用品職員介紹左間餐廳, 超多人冇位! 最後搵左間拉麵食.
我地食哂碗麵青姐都未得. 麵店已經last order, 我地就whatsapp個menu俾青姐選, 順便幫佢落埋單. 但我地等到好耐都未見青姐黎. Shuttle 20分鐘就到, 店又就快close, 食物又已經到, 我地都好心急驚青姐趕唔到.
終於青姐都趕到黎, 以極速食哂碗麵, 仲可以趕到Shuttle返酒店呢.
咪以為番到酒店就訓覺. 我地不忘浸個靚溫泉先. 原本諗住聽日上午報名玩snow mobile, 但大家覺得呢兩日滑雪太早起身, 所以決定聽日晏d起身, 浸下溫泉hea下就算.
沒有留言:
張貼留言