行程: 二世古Annupui
今日一早我地就要起身食早餐, 因為我同Ada姐係網上報左4小時2人滑雪班, 10點要上堂. 所以我地7點半就去左食早餐. 酒店包左早餐, 選擇都選多, 味道唔錯, 仲有自助咖啡機同好多茶包, 真係好想試哂!
由於今日要體力勞動, 所以我地都食到好飽, 之後就上房拎行李落黎check out.
我地會分開玩, 青姐同Ada老公Ken哥都識滑雪, 所以佢地坐9:30Shuttle去Niseko Village Hilton check in, 同時會係Niseko Village山頭滑雪, 而我同Ada姐就留係Niseko Annupuri學滑雪. 我地9點幾就係酒店租好滑雪用具, 佢會叫我地填form, 最主要係身高體重, 因為雪橇長度以身高決定. 試好哂裝備, 我地就去滑雪學校counter報道, 好彩上course包埋頭盔所以唔使額外租.
等左一陣有位日本教練就黎搵我地,佢叫信. 佢同我地打完招呼佢就幫我地檢查裝備, 然後就出去滑啦.
我係報名前有話過我同Ada姐既滑雪經驗同goal俾滑雪學校知. 我同Ada姐都係學過基本知識, 但仲未係好識滑, 所以希望可以學識滑一條初學者滑道.
教練信再簡單咁教我地一次上橇, 用單橇滑行, 跟住用雙橇, A字剎, 再用8字上坡, 跟住就開始滑落去gondola處. 起初我成年都冇滑所以滑得好慢, 而且仲好大風雪, 我同Ada姐好耐先落到去, 跟住教練就會幫我地卸下雪具, 帶我地上車再載我地番酒店再黎過, 都幾好服務, 唔使我地自己行番上去 =P
之後我地試第二次滑行, 由於我warm up夠所以我開始好快咁落左去, Ada姐似乎唔係好識, 所以教練就睇住佢多d. 之後我地又坐車上去再黎多次, 今次教練係門口一個比較斜既地方同我地講叫我地滑落黎, 起初唔知佢講乜, 因為佢只識簡單英文, 不過算啦我滑左落去先講. 我成功滑到落去, 但Ada姐就跌低左, 所以佢就話下午我可以上山滑, Ada姐就要留係原地. 好野!! 可以上山一試, 真係又驚又喜.
不過教練話我同Ada姐程度原來唔同, 所以佢suggest我地下午分開學, 但咁會變左一對一, 要加錢! 原本個course已經貴, 要44000 for 2, Ada姐唔想再俾錢, 所以我地決定下午一人一小時私人教授, 頭一小時教練帶我上山, 之後就係番酒店教Ada姐.
商量好我地就食lunch先, 因為怕煩所以係酒店食算. 青姐同Ken哥坐Shuttle過黎join. 我食左天婦羅烏冬, 味道唔錯.
飯後我地又開始上堂啦, 首先係我上堂先, 點知出到去發現拎錯Ada姐雪撬, 真係出師不利.
滑左落chairlift處, 教練就叫我係固度等, 佢幫我買票. 之後我地就坐chairlift上山. 今次係我首次坐chairlift上山, 好興奮呀.
坐chairlift途中我問教練點樣可以幫goggle除霧, 因為我塊雪鏡成日起霧, 攪到我睇唔到路. 睇黎佢都冇咩方法, 不過佢可能見到我戴全視線眼鏡, 所以佢叫我竟然唔使戴goggle. 我又試下先. 講講下我地就黎到站啦, 我開始驚唔知點落chairlift. 因為聽青姐講話坐chairlift係有技巧既, 尤其係落chairlift時, 因為落chairlift前面會有小坡道, 所以好容易跌倒. 青姐就話頭先佢同阿Ken係Niseko Village落chairlift時就老貓燒鬚, 因為坡道比想像中斜所以就向左炒向右炒.
好彩呢個chairlift前面坡道好平, 所以好容易就出到去起點.
嘩! 好高呀! 企係半山一望無際真係好靚. 教練叫我跟住佢滑, 叫我唔使驚, 佢會接住我既. 於是我就跟住佢大A字既姿勢落山. 不過我比較緊張, 所以用左唔少力好累. 又因為A字太大, 所以滑得好慢 =P. 終於去到一個分支路, 教練叫我除左雪橇休息一下, 仲幫我 影相tim ^o^! 我終於都可以上到山, 我真係好開心呀! 諗番我上年係韓國已經滑到一條slope仔冇跌到, 其實可能已經算學識左, 不過聽朋友講太斜而唔敢坐chairlift上山玩啫.
休息一陣我地就向右轉去junior course繼續滑, 我開始問教練點轉彎. 佢就教左我少少技巧, 但我都係轉得唔太明顯. 滑下滑下就到左酒店. 原本教練預左我半個小時已經番到酒店, 點知我成個鐘先落到=P, overun左, 所以佢即刻入酒店搵Ada姐繼續學, 佢叫我可以自己上去滑多次.
我入番酒店, 見到除左Ada姐, 原來Ken哥同青姐都係度, 佢地話岩岩係上面滑左次, 發覺呢邊好滑過Niseko Village固邊, 因為條路好寬同長, 可以好好練習技巧. Niseko Village固邊初級路太平, 有時會停左係度.
Ada姐跟教練出去學習, Ken哥佢地叫我一齊上山試多次, 咁我地一齊落山, 去到chairlift固邊, 青姐幫我買票, Ken同我就係chairlift等佢. 佢買到票我都未著番雪橇!
青姐叫Ken拎住張票, 佢幫我著. 好辛苦著完, 點知唔見左張票!!!!! Oh! no, 忙忙大雪吹左去邊呢.... 青姐發現去左山坡下面!! 於是落去執番! 哈! 咁都得, 竟然執得留 =D
我地上到山後, Ken哥就想做個實驗, 就係想我係後面扯住佢滑落去, 如果可行佢就可以帶Ada姐玩. 結果係固條路越滑越斜, 越黎越快, 最後失控跌倒.好狼狽.
我又攪左好耐先係斜坡起到身著番雪橇, 天色已經開始黑, 而且好大風雪, 前面咩野都睇唔到! 要快d下山先.
落到去都4點半, 見到Ada姐已經還哂野, 佢好失望咁話試左兩次落山都冇咩進步, 所以佢提早收工!
我還番哂滑雪用具後, 就拎番哂行李, 等shuttle bus過Niseko Village Hilton. 阿Ken同青姐買左Niseko United All Mountain Pass所以可以係Niseko既山頭任坐gondola, chairlift同shuttle bus. 而我同Ada姐只係Annupuri活動, 都唔知上唔上到山所以冇買Pass, 所以坐Shuttle要俾錢.
去到Niseko Village Hilton, 佢個lobby好大, 比較grand, 仲好多滑雪人著住滑雪鞋行黎行去, 唔似得係韓國high one CC酒店唔俾人著ski boot行.
我地check in後就係酒店食算. 佢有幾間餐廳, 但價錢好貴, 要7, 8千yen以上. 起初以為得呢度有得食唯有幫襯呢度算. 我地食左個set, 6千幾yen, 好多野食好飽, 味道一般啦.
食飽左當然就係要歎一歎溫泉啦, Hilton個露天風呂好大好舒服, 在飄雪下浸溫泉好正, 可驅除滑雪後既疲勞.
好啦, 又要休息預備聽日既勞動啦.
沒有留言:
張貼留言