熊出沒注意: 2015東京河口湖甲府賞櫻美食爆喼行Day 1

HK Express有promotion, 1600元可以買到羽田機票. 雖然係凌晨機來回. 但對於我呢個想玩得盡d既人黎講正合心意. 而且4月有機會睇到櫻花, 請3日假已經可以去8日, 所以就速成今次旅程啦.

我同肥仔同明明三人行, 九點幾去機場, 坐凌晨機去羽田. Check in時HK Express居然話我冇買寄存行李費. 好彩我有print低張機票出黎咋.

我地11點幾起飛, 入左境都未到六點, 好眼訓呀 -_-Zzz...Zzz...
入境後我地就坐京急線坐電車至品川再轉出手線去澀谷. 途中我開始試下係鴨記買既富士卡. 唔知點解我部三叔機加唔到新APN. 結果攪左好耐將現有既APN改左佢先work到.

由於今次我地唔係住酒店而係住澀谷apartment, 所以冇得寄存行李, 唯有係澀谷車站搵locker放好行李. 再轉火車去吉祥寺啦. 我地事前係網上搵到個site係講火車站locker size及位置, 起碼我地知道固度多唔多大size locker放行李啦.
http://coinlockersearch.com/shibuya.html

呢排大陸家長爭買既日本書包

我出發前去Tabelog搵到間cafe有早餐食, 所以我地第一站去左食早餐. 去到間cafe見到Menu就即刻滴汗.... 原來全部都係麵包muffin餐!

佢既麵包好天然好好味, homemade jam都好好食

臨走時見有麵包出爐,忍唔全買黎邊行邊食啦

得四五個set選, 仲要有個Set冇, 都唔知好唔好食同夠唔夠飽 >_< 兩個男團友開始有微言... 後黎大家都話算啦, 就叫哂三Set食啦. 果然個set唔係好大, 但係一食落去大家都俾佢既天然味道吸引住啦. 佢既scone唔甜, 淡淡既味道滲出麥味, 好raw好天然好好味.

我地食完後諗住埋單去井之頭公園, 咁岩見到佢有d出爐既香蕉麵包, 於是我地又忍唔住買左
兩個飽邊行邊食. 本來唔飽變左食到好飽 =P

早餐間cafe係井之頭公園對面, 所以食完行去井之頭好近. 我地黎井之頭當然係去睇下d櫻花
落哂未啦. 因為已經係4月6日啦. 其實櫻花已經開始落緊. 好彩仲有d位仲ok, 影相都仲可以
呃到人啫, 呵呵.

睇完櫻花我地開始分散係吉祥寺商店街行街. 我已經有9年冇去過吉祥寺啦.
而家既吉祥寺除左小店外, 多左平價零食店同大型百貨(e.g. Yodobashi)等.
我只係得個幾小時行, 所以唔係好夠, 下次去東京我應該會花半日至一日深度行吉祥寺.

到左十點幾我地集合番去食好野. 係咩? 咪係吉祥寺名物松阪牛肉球啦. 我地去到已經見到一條長龍. 二話不說即刻排埋一份. 點知排排下覺得唔對路.原來我地排錯隊, 呢條隊係排隔離紅豆餅架. 我地本著有人排緊可能係好野既心態兵分兩路排隊. 結果食完真係好失望, 只係好一般既紅豆餅咋. 至於牛肉球皮薄餡靚, 比我九年前食仲好味.

好好味既牛肉球呀

呢個長龍店係牛肉球隔離,但係味道一般

哈哈哈, 我地今日真係好變態, 食完牛肉球又去食美登利. 因為吉祥寺有分店, 所以諗住11點幾去食, 點知岩岩客滿, 要等成個鐘先有得食.我地叫左個平日限定1600 set, 1600 set已經有toro, 雖然唔算最好質素, 仲想點呀.個士多啤梨sorbet仲好好味呢.

食完lunch係時候坐火車返澀谷check in. 今次我地住apartment, 經airbnb book.一個開放式單位有一張雙人床同兩張梳化床, 仲有個小小廚房. 洗衣機. 最好佢有portable wifi.可以隨身帶好方便. 每晚每人唔使HK400, 都算幾抵住. Apartment係Mark City附近. 可以穿過Mark City過去. 唔使行斜路. 我覺得好岩一家人有小朋友去住. 房東俾左地圖同video教我地點樣去附近大廈
開鎖拎key. 我地覺得好有running man完成任務固種feel =D

Check in後我地就決定訓一陣覺先再出去睇櫻花. 可能大家凌晨機真係好眼訓, 一覺醒黎已經
係夜晚6點幾! 既然已經咁晏, 咁就聽日先去睇櫻花啦. 不如係超市買野番黎煮飯仔算. 我同明明就去左附近行街. 明明此行係要買日製sexaphone, 所以我陪左佢去間樓上音樂店格下價.
之後我就去左明治通行下.固度有as know as de base, rosebud, burrberry blue label, 仲有
精品店. 睇完一輪到九點就返去apartment. 肥仔已經係超市買左好多野食返黎啦. 我地就煮左松陂牛扒, 和牛漢堡, 松陂牛火鍋食啦. 食完大家就沖涼訓覺. 因為聽日又要鬼咁早起身去築地食早餐啦.