滑雪新手裝備之經驗分享(Updated 2019)

其實我決定去滑雪之後, 對於滑雪要咩野裝備一竅不通, 好彩同行既同事青姐佢滑左幾年雪,
佢帶左我去睇左唔少滑雪裝備. 我先知原來要滑雪都要要投資唔少錢架. 以下就係需要既滑雪裝備:
1. 排汗衣排汗褲
菁姐話保暖衣都可以, 但排汗衣除左保暖外, 當運動出汗時有排汗功能, 而保暖衣只會保暖, 所以佢提議我買排汗衣. 佢買開Cloumbia既omni heat, 但就係上衣都要5百幾蚊, 一套衫褲已經過千, 有朋友話係uniqlo買左heatech, 而我就係一田見到有間叫Traveller既排汗衣褲特價, 一套都係3百幾, 所以我買左兩套, 我試著左兩次都ok, 所以大家可以諗下.

2. 滑雪衣
滑雪衣出面係防風防水, 裡面可以係fleece或者羽絨, 我sogo thankful week係lafuma買左件一件頭雪衣, 只有淨色都要1600蚊, 後黎先跟青姐去左Columbia, QuickSilver睇, 發覺QuickSilver同Islands Wake既雪衣款式比較靚, 所以後悔買左件淨色tim. 仲有一點係我每次好辛苦咁著完對ski boot後我已經熱到濕哂, ski時又好熱, 所以其實買拆得既雪衣比較好.

3. 滑雪褲
我第一次去滑雪前行經一田, 見到Traveller既滑雪用品比較平, 所以就買左好多野, 其中買左條4xx雪褲好平, 但一著ski boot就出問題, 就係佢既褲管太窄套唔到隻ski boot!! 攪到我又要買過條. 今次我係Islands Wake買左條snowboard褲, 聽講ski都可以著snowboard褲, 只要防水防風就得. 今次我買既褲腳有zipzag, 必要時要整寬d. 而且款式又唔錯, 好多袋, 呢個就最正. 除非你額外帶袋, 否則最好就係雪衣雪褲多袋, 咁就可以放哂貴重物品手機係衫褲袋啦.

4. 雪襪
我又貪平係Traveller買左3對襪, 點知俾ski tour內既一個大嬸團友話我襪咁短, 原來佢話雪襪要長過ski boot先岩, 由於滑雪時小腿要壓住ski boot, 所以雪襪長d小腿冇咁痛, 我後黎係韓國雪場買左對試下, 真係好好多.

5. 雪鏡
我係一田買, 4xx好平, 可以戴埋眼鏡, 但係就冇防霧功能, 攪到我未出發前成日睇唔到前面, 試過用防霧布唔work, 岩岩係北海道買左防霧噴劑, 下次會試下得唔得.
(2019: 2019年1月去北海道滑雪, 今次係淘寶淘左個3xx既防霧雪鏡, 比我之前買既好左)

6. Mask
滑雪時好大風或大雪, 所以最好買個Mask, 一田1xx已有交易.

7. 手套
要買防水既厚手套, 一田Traveller百幾蚊一對又平又ok.

8. 雪帽或頭盔
一般初學者最好借頭盔, 之後可以戴雪帽.
1. 如果你只想玩一兩次就算, 咁樣你可以直接係滑雪場租滑雪衣褲, 雪鏡及頭盔, 但如果諗住仲有機會滑雪就最好買埋雪衣褲.
2. 雪襪, 手套, Mask無得租最好自已買定去.
2019: 朋友係廸卡農買左個頭盔, 價錢唔貴喎.

滑雪用品地點:
1. Columbia
2. QuickSilver
3. 一田
4. Islands Wake
5. X Large
6. CWB X Large下面有間地鋪店都有雪衣雪褲賣
7. 係網上search過話花園街希超平雪褲, 不過未著過唔知好唔好
8. 觀塘Play, 係一間提供ski and snowboard課程既地方, 裡面有shop賣滑雪用品
9. (2019) 廸卡農比大陸買左後係香港開左幾間大店, 地點方便如旺角雅蘭, 將軍澳尚德有間好大既店呢. 如果第一次諗住試下, 唔捨得投資可以黎買d平野試下先.