熊出沒注意: 2016東京伊豆賞櫻美食Encore遊Day 2

伊豆戶田高足蟹

行程: 西伊豆(沼津港, 韮山士多啤梨園, 戶田港之一食堂高足蟹, 碧之丘, 花之時計, 戀人岬, 堂ヶ島ホテル天遊)

今朝一早就要起身, 因為係book左8:00係橫濱西口拎車. 我地check好車放好3大行李就出發啦 ^O^
我地今日先遊西伊豆, 之後就係南伊豆, 最後係東伊豆. 我2010年已經遊過中伊豆, 東伊豆, 所以今次最期待係去西伊豆啦.

我地第一站已經係食食食啦!! 經過個多小時車程我地就黎到沼津港. 沼津港最出名就係海鮮. 而當中最出名就係壽司山正既山正海鮮井. 因為海鮮井1日只有25食. 所以lunch time時段好多時都要排隊. 我地去到沼津市後原本諗住泊係壽司山正對面既停車場,

但係有團友人有三急, 所以我地見到有間車行就泊左入去借toilet. 裡面既服務員已經出黎迎接. 我地借完toilet就順手問佢可唔可以泊架車係佢度, 食完lunch返黎拎. 點知佢話可以!! 就係太好啦, 停車場錢都慳左 =P

我地11:00到達壽司山正, 可能係平日關係, 唔算好多人, 真係好. 我地登記左就係隔離蔬果店行下, 見到好多由唔同地方黎既蔬果, 所以我地就唔小心買左d食.

到左11:30開始多人, 好彩我地登記左第一輪有得食. 山正井雖然好多都係甜蛋, 八爪魚, 青瓜等等, 但食材新鮮. 而且佢都有toro係裡面, 所以都有肥美既感覺, 再加上壽司醬油, 又真係唔錯喎. 價錢仲好平添. 880yen好鬼抵!!

山正井好鬼抵

食完brunch我地就去伊豆之國市. 呢個地方有好多士多啤梨果園, 果園有30分鐘任摘任食, 可以遠眺富士山. 不過今次我地冇任食, 因為一陣仲有樣好重要既野等我地去食=P. 肥團友買左杯雪糕食, 見佢食完個樣好滿足咁樣, 我又買左杯食. 雪糕充滿士多啤梨果香, 好好味啊. 另一女團友佢雖然對奶類敏感, 但都冒住肚屙危險試左一口. 試左真係不得了, 又忍唔住食多啖先收手. 食完雪糕我地買左2盒士多啤梨先離開, 向全戶田進發.

士多啤梨有一片油菜花田

戶田呢個地方對於好多人比較陌生, 但原來佢有樣食物係好出名架, 就係高足蟹. 高足蟹只在西伊豆半島、日本最深的海灣的駿河灣生長. 當造季節只有每年9月至5月, 高足蟹既特徵當然係佢既長腳啦. 我地係網上見到有間之一食堂有高足蟹食, 所以就去見識下啦. 去到時佢話今日只剩下一隻蟹, 特價8800yen賣俾我地(原價每隻10000yen起). 我地於是就上二樓等食啦.

當店員抬高足腳上黎時, 我地都嘩一聲. 真係好大隻喎, 佢既蟹身呈水滴型, 有我塊面咁大. 佢隻腳真係好長. 佢既關折位好容易折開, 所以好容易食到蟹肉. 啖啖肉好鮮甜好滿足. 食飽飽我又買左戶田另一特產戶田鹽, 之後就去戀人岬啦. 途中我地經過碧之丘同花之時計, 見幾靚所以我地落左車去影相. 之後又去埋戀人岬, 見天色唔早所以我地趕入去天遊堂島溫泉旅館check in. 呢間溫泉旅館冇銀水莊咁大咁出名, 但佢既景係最正既, 因為酒店距離被稱為絕景既三四郎島係最近. 我地為左絕景仲book左角部屋, 可以同時眺望三四郎島和駿河灣美景. 我地有幸可以欣賞黃昏日落既美景. 真係高興.