12日東京伊豆吃喝玩樂賞櫻之旅Day 2

今日因為夜晚要等其他團友到來, 所以都係去左原宿行街.

由於坐凌晨機既關係, 所以今日10:00a.m.先食早餐.
好彩我地住既酒店包埋早餐, 所以可以唔使諗去邊度食.
酒店平日會開放lobby restaurant食早餐, 假日就會開埋
樓上日本餐廳. 而今日正值假日, 我地就下左去
日本餐廳食早餐叻. 可惜有D後悔, 因為選擇好少. 聽日一於落
lobby食啦.

食完早餐就出發去原宿. 因為未坐過副都心線, 所以專程行過去搭.
因為我既目標係La Foret. 從副都心線既明治神宮 前站一出就係La Foret,
非常方便.
La Foret商場有好多層, 中間仲有半層半層既商場.好多係香港i.t.代理既品牌都係固度都有店鋪. 係固度買平過香港買.因為香港mark up左好多.我係La Foret真係好唔小心買左好多野呀. 心諗"死啦, 而家先第二日咋喎, 點算好....."
行完La Foret都已經2:xx p.m. 於是就去左食九州拉麵.我地排左成大半個鐘先有得食. 咁多人排真係要睇下佢係咪好味先.結果都冇令我地失望.

食完lunch仲有少少時間, 於是就去左高円寺度行. 因為見旅遊書話有懷舊玩具賣, 所以純粹去逛下.

高円寺每邊出口都有商店街, 通常都係boutique同野食多. 另外都有少少懷舊玩具店, 我自己就覺得冇乜特別, 除非你真係好鐘意舊玩具啦. 所以我地係固度買左D平價零食就搭JR返池袋.諗住順手睇下係邊個JR出口接其他團友同幫佢地拎行李. 我地研究完一輪諗住返酒店放低D野, 點知咁岩見到佢地係酒店門口出黎!! 原來佢地太多行李所以決定唔搭NEX而搭機場巴士, 咁岩又冇塞車所以比預期早到. 我地見佢地到哂所以都冇返酒店放番野. 直接出去食晚餐. 因為都差唔多七點啦, 老人家要早D食飯休息.

我地去左酒店對面既Metropolitan Plaza, 樓上都幾多野食下. 朋友仔大哥
話佢地上次食過一間北海道 野菜放題話好新鮮好好食. 於是就去試下叻.

食物選擇唔係好多, 有豆腐, 魚, 沙律, 幾款飯, Soba, 菜等等. 甜品有蕃薯,
杏仁豆腐等. 新鮮係新鮮既, 不過寡左D囉. 因為冇肉食 =P  3千多yen都ok既.

食完餐飯都8:30p.m. 於是坐電梯落去, 咁就大穫啦. 因為原來呢個Metropolitan Plaza全幢都係賣女人野. 我即刻兩眼發光, 講左一句:"你地返去先啦", 咁又繼續行街. 不過呢間Plaza 9:00就Close, 所以行左半個多鐘, 你一買野俾錢, 個Sales好自然咁帶你到門口然後先躹躬俾袋貨品你請你離開. 呢招都真係幾好用.

 Hotel Breakfast

副都心線

池袋南口

Metropolitan Hotel

呢間原宿既餐廳一早就有人排隊啦喎

食拉麵要排隊架

招牌九州拉麵

  高円寺

北海道 野菜放題

實用資料:

 高円寺  http://www.koenji-navi.com/

 La Foret  http://www.laforet.ne.jp/index.html

九州じゃんがら http://www.kyusyujangara.co.jp/

副都心線     http://www.tokyometro.jp/rosen/eki/meiji-jingumae/index.html