行程: 輕井澤雲場池, 白系瀑布, 石之教會, 淺間溫泉星野界松本
如果大家有睇我既遊記既話都會知道我呢幾年去旅行前後都會有突發事件發生架啦, 尤其係11月!!! 所以係6月決定去日本既時候, 直到9月報導中日釣魚台主權爭議事件, 都令我好擔心, 因為好驚係我出發前有事發生, 好彩都完成旅程返到黎. 不過都有少少波折架, 就係係我出發前一星期連續幾日"訓黎頸", 攪到有日起身時後頸痛到起唔到身, 條頸郁都郁唔到,唯有即刻去左朋友仔介紹既物理治療師度睇, 一共睇左3次, 仲要每次俾佢係咁"啪"頸, 終於都整番鬆佢, 但係條頸仲係好痛, 點算好呀? 我仲諗住去日本玩過山車架. 唉, 希望去到會好番啦.
我地今次去8日, 因為CX既二人同行有效日期為7日, HKD1900, 正常價要HKD3500架, 所以呢我地為左玩盡佢, 又選擇左凌晨機出發. 今次唔知點解有lounge入忝, 所以早左少少去機場坐下食下野.
飛機準時係1:05起飛, 6:15到達成田機場. 我為左要趕上第一班NEX去東京站, 所以連toilet都冇去就去左過關先, 再拎埋行李就即刻搵電梯落一層B1/F去搵Ticket Office買JR Pass. Ticket Offfice唔難搵, 只要跟住"鐵道"既指示牌落B1/F, 轉右過左玻璃門就會見到左手面有個紅色既JR EAST Travel Service Center. 不過咁早佢係未開門既, 要去佢對面即係右手邊既Ticket Office買票先得. Ticket Office都係紅色既所以好搶眼好易搵. 我地去到時時間好早, 所以冇乜人排隊. 於是我就同職員講我要買JR Kanto Area Pass同NEX & Suica 單程Package. 跟住佢問我NEX想去邊, 我就話想由池袋去機場, 佢就話唔得架, NEX & Suica Package一定要由機場出發架!!! o下, 乜咁奇怪既咩??? 都怪我做少左功課啦. 唯有買左張JR Kanto Pass先算. 之後我就拎左預先寫好既劃位list俾職員劃位, 佢都好快咁幫我攪掂哂由成田去東京NEX, 由東京去輕井澤同由輕井澤去大宮既Asama指定席票. 買哂票7點都未夠, 終於可以鬆一口氣去下toilet同去便利店貫枝野飲下. 呢個時候Ticket Office已經有人龍啦. 好彩早D買票咋.
又係零晨機呀 -_- Zzz...Zzz...Zzz..
成田晨光初露
好彩一早黎買JR Pass咋, 你睇買完幾多人
JR Kanto Area Pass連續3日有效期
到左7:25我地就入閘去坐NEX. 我地入閘只要去最邊有人既閘位show張JR Pass就可以直入架啦. 跟住去到月台我地就按照劃位票上既位置編號搵番自己個位坐就得. NEX坐位好闊落, 伸直隻腳都冇問題, 而且夠哂準時,所以真係幾好架.
要根據票上既坐位編號搵好位坐
我地訓左一陣, 8:55到達東京站, 我地又要由地下5/F上5層搵長野新幹線月台, 好彩我地坐7:33固班車, 所以有充足時間搵到個月台, 9:20 Asama號列車準時開走, 10:33就到達輕井澤啦.
東京站
要睇水牌做人呀
一出列車我已經feel到幾凍, 所以就開喼拎件Uniqlo羽絨試下頂唔頂得住. 我地首先搵日產租車公司先. 日產租車公司就係南口行落行人天橋u turn直行, 其實佢就係Prince Outlet隔離. 好方便. 不過我地見到部lift壞左, Oh no, 即係話我地要抬行李落樓梯啦, 咁聽日咪要抬上去???
不過今日唔知係咪星期日呢, 都幾多人排隊租車, 我地等左一陣先到我地, 經過左一輪手續, 驗車, 教導之後,我地11:45先可以出發. 第一站去著名景點雲場池.
雲場池好近輕井澤站, 大約5-10分鐘已經到, 不過去附近駐車場既路好窄, 又多人係度行, 朋友仔好怕人多, 佢已經想掉頭走, 我梗係唔想啦, 所以最後都去到駐車場, 嘩, 不過駐車場要成900yen!! 真係識搶錢.
泊好車我地就行去雲場池, wow, 好靚呀, 周圍有色彩繽紛既紅葉襯托住. 雖然遊人好多, 但係大家冇喧嘩大叫破壞寧靜既環境, 所以好有仙境feel. 好彩冇掉頭走啫.
成日聽人講雲場池有幾靚, 真係要親身見到先體會到佢有幾靚.
睇完景已經1點, 所以我地就揸車去食lunch, 之前係tabelog食評網見到有間叫川上庵食Soba幾好食評, 所以就諗住試下, 不過佢下午冇車位架, 所以要泊係舊銀座街既駐車場. 1小時200yen. 我地行番去川上庵時見到有人係出面排隊, 朋友仔怕過泊車時間, 又驚等得耐(男人就係咁=P), 佢又去第二間食. 不過我見有人排隊應該幾好食, 所以決定繼續排. 好彩好快就有位. 我地order左兩個天婦羅Soba, 估唔到隻蝦咁大隻喎, 仲炸得幾靚忝, 唔會好似香港固D咁炸到脆漿厚厚咁. 真係好好味. Soba麵質比較粗糙同有咬口, 我覺得唔錯.
隻蝦好大隻喎
跟住我地再繼續去石之教會, 因為係相度見到佢既建築幾特別, 但係因為岩岩有人結婚所以只能遠觀.
石之教會
好叻, 今日既行程都完成啦, 我地要揸兩個幾鐘車去淺間溫泉. 由於差唔多到冬天, 所以4點幾5點已經天黑. 係冇街燈既IC上趕車都幾攞命, 朋友仔好想訓覺, 攪到我要係咁俾糖佢咬. 等佢唔好揸車訓著. 到左6點幾,我地終於到達淺間溫泉, 而我地今晚入住既酒店係星野集團既星野界松本. 呢間係一間得26個房間既精品溫泉酒店. 酒店係由日本有名既建築家設計, 佢地最主要係sell service. 我地一停架車係酒店門口就已經有人出黎迎接啦. 佢地幫我地拎行李出黎, 另外有人幫我地泊好架車, 跟住我地就跟一位女職員去Lobby坐.呢間酒店既Lobbby幾好情調.
我地坐低左就有人奉上Welcome Drink同糕點, 幫我地辦Check-in手續, 跟住佢地就想帶我地上房. 但係我地之前order左兩張prepaid sim叫b mobile送黎酒店, 又send左email叫酒店代收, 佢地話會幫我地keep好,點解唔見佢拎埋俾我既呢? 於是我就問下佢. 佢地似乎要時間搵. 死啦, 好驚唔知佢地收唔收到呢? 好彩最後佢地都搵番兩pack sim出黎. 跟住女職員就拎住我地既行李帶我地上房, 然後介紹左房內設施,浴衣, 睡衣等等, 又同我地講因為人多關係, 所以我地要7:30先開飯. 好啦. 我地都唔會出街所以就係房度休息下.
就係我地好奇咁周圍睇下房內有咩既時候, 我好似聽到出面"bong bong"聲. 好奇既我於是揭開窗簾睇睇, Oh.原來出面居然放緊煙花, 而且係好大固D. 於是我立即叫朋友仔黎睇, 點知佢黎到即刻靜哂, 咩野都冇, 哈哈,我都好D睇到幾個煙花. 跟住我地又試下張sim得唔得, 朋友仔既iphone好快就connect到, 但係我既samsung就攪黎攪去都唔得-_-, 到左7:30食飯時間, 唯有帶埋落去攪啦.
我地今次食飯唔係部屋食, 而係去佢既食事處食, 不過佢既食事處係圍住池邊間左一個個小個室, 所以我地食飯都有privacy. 我地坐好就有位女職員招呼我地, 佢既英文都幾好, 佢話佢去過加拿大一年. 同我朋友仔都有講起加拿大既野. 之後佢就開始奉上食物. 呢度同一般溫泉酒店放滿成檯既懷石料理唔同, 佢係逐碟逐碟上.而且每黎一碟佢都會介紹一番. 因為我地住既酒店係信州, 所以佢既食材都會用信州當造既食材. 好似我地今次係秋天黎, 所以可以加2000yen食佢既秋之懷石. 內有栗子同秋茸(菇菇). 信州有個叫小布施既地方係出名栗子架, 所以佢就將栗子放落飯度食, 最後仲用栗子整左個甜品呢. 另外信州秋茸雖然唔係出名, 不過佢話產量少,所以好rare. 最好就係配上信州和牛一齊燒黎食. 整體黎講幾好食, 材料刺身都好新鮮. 我地一路食一路同女職員吹水, 佢知道我地聽日想去松本, 佢即刻拎左好多關於松本同長野既小冊子俾我, 裡面仲有地圖同埋泊車地方, 真係好. 仲有就係女職員留意到我唔食漬物, 佢話聽日早餐俾其他野我食, 抵讚.
Soba壽司, 因為信州Soba好出名
刺身好新鮮呀
好鬆軟
信州和牛配菇菇
小布施栗子飯
今次既晚餐份量岩岩好, 冇好似之前幾次既溫泉酒店咁食到第2round已經唔掂, 幾好呀, 唔使浪費食物.
9:30就食完晚餐, 朋友仔一心想休息, 所以佢好似"死"左咁訓左係Tatami上. 而我呢就去左Lobby既賣店睇下.有堆日本人已經坐係Lobby吹水, 又有一堆日本人好似我咁睇下土產. 但係呢呢度好少土產賣, 唔係好吸引,所以睇完就上番房準備浸溫泉叻.
呢間旅館雖然有大部份既房附有露天風呂, 但係出面既男女湯有成13種spa玩, 所以都唔少人會出黎浸下.我當然樣樣都玩啦, 順便希望可以治療下我既"訓黎頸", 希望浸溫泉可以令條頸好D啦.
浸下浸下都浸到12:30, 於是順便係女湯沖埋涼先返上房訓. 因為浴場既設備好齊全, 完全唔使係房shower.好啦, 浸完真係好眼訓呀, goodnight啦.
實用資料:
JR Kanto Area Pass
http://www.jreast.co.jp/e/kantoareapass/
NEX & Suica Package
http://www.jreast.co.jp/e/suica-nex/
軽井沢
http://karuizawa-kankokyokai.jp/
http://www.go-nagano.net/tw/modules/contents07/index.php?id=1&mode=disdetailsisetu&cityid=26&junleid=1&indexid=6&kubuncode=1
川上庵
http://www.kawakamian.com/
星野界松本http://kai-matsumoto.jp/
沒有留言:
張貼留言