行程: 豐州LaLaport => Aqua City台場 => 高達Diver City => 池袋
朋友仔既屋企人終於黎到日本啦, 我地既行程即刻轉做Hea遊, 因為有老人家同行. 我都唔想plan太多, 一切都由朋友仔大哥話事. 佢話今日去高達先, 因為驚星期六去好多人喎.
咁之前去邊好呢? 我話不如去附近既地方行下, 就去豐州LaLaport啦, 因為未去過想去年睇下.
豐州LaLaport就係東京彎豐州, 其實南船橋都有個LaLaport, 應該仲大過豐州固個忝,不過豐州就近台場D.
我地行分頭行左個幾鐘就集合成lunch. 呢個地方野食選擇唔多, 再加上大家都有好多野唔食,所以最後去左間食蛋包飯既餐廳啦.
食完lunch我地就坐海鷗號列車去台場, 海鷗號列車有大窗睇風景都唔錯.
去到台場站, 我地就去左Aqua City, 朋友仔大哥去G-SHOCK買錶, 我同朋友仔媽咪就去左Agnes B買袋. 我買左個粉紅色既日本限定袋. 之後我地就行去Diver City, 當然就係去睇下個1:1高達啦. 成個高達前前後後影左好多張. 影完就係賣店行下, 朋友仔大哥見到有個扭蛋幾靚就拎錢出黎玩, 佢問我朋友仔玩唔玩, 朋友仔見都幾貴所以話唔玩. 朋友仔大哥第一個抽中個透明既高達, 佢就想再抽個綠色既, 點知第二次又係抽中透明, 到第三次先抽中綠地, 所以佢就俾左個透明既高達俾朋友仔, 佢就話佢唔自己出錢玩係有道理既. Heehee.
玩完扭蛋我地就走左入Diver City樓上既高達館睇下, 不過我地冇入到去, 因為要錢痳. 所以就行下免費既區域. 行完高達都仲係四點幾, 我地諗下番唔番池袋等食飯好. 因為我地禽日book左今日7:00係Sunshine City食懷石料理. 我地最後都決定返池袋行下等食飯. 就係我地行去Teleport站坐車時, 見到原來Diver City都有Hello Kitty店同Calbee店, 由於前日去到東京站卡樂B既時候佢既即製薯片counter已經close左, 所以我即刻去買兜即製薯片食. 果然熱辣辣既薯片好新鮮好好味喎. 好快就俾我地掃哂啦. 跟住我地就行去Teleport站坐車返池袋, 因為唔使轉車痳.
返到池袋我地又分開黎行. 朋友仔大哥自己行, 而朋友仔父母話想買生果今晚返酒店食, 咁我就用mobile上網研究下啦, 之前睇過朋友既旅遊書介紹左間24小時平價超市Seiyu.我就係網上search下佢既位置係邊. 點知大家似乎越行越遠, 就係我地停低望住街邊地圖時, 有個日本人用英文問我地有咩野幫忙, 我地就問佢呢度附近有冇超市, 佢聽到就即刻帶我地行去, 佢話其實去Sunshine City都有生果賣, 不過就貴D, 所以佢都係叫我地去Seiyu. 佢一路帶我地去一路同我地傾計, 原來佢係係池袋返工既, 佢都係住池袋, 不過就係另外一面. 佢真係好nice同埋英文好好.
朋友仔媽咪買左兩個蘋果同蕉, 而我見到巨峰提子就買黎試下叻. 買完水果我地就行返去Sunshine City行下.朋友仔Daddy唔想行就搵左張凳坐下睇下書. 而我同朋友仔又繼續血拼下. 到左6:45我地就集合一齊上Sunshinecity 59/F既天空の庭 星のなる木食懷石料理. 呢間餐廳位於59/F, 可以遠眺池袋夜景. 不過價錢梗係唔平啦. 最平既Set都要7000 yen. 我地就叫左10000yen既set食啦. 係呢間餐廳食飯就好似食緊法國菜咁, 因為食一餐要成三個鐘!! 食完已經10點幾, 所以我冇再去其他地方行街, 慢慢行返酒店休息下睇下日本電視算啦.
實用資料:
豊洲Lalaport
http://toyosu.lalaport.jp/
Gundam Front Tokyo
http://gundamfront-tokyo.com/en/
天空の庭 星のなる木
http://www.ginza-cruise.co.jp/tenku-no-niwa/
西友超市
http://www.sunnypages.jp/travel_guide/tokyo_food/groceries_supermarkets/Seiyu+Ikebukuro/2962
沒有留言:
張貼留言